Eit bloggedilemma og eit pippikostyme

Då eg opna nettbutikken i oktober i fjor tenkte eg med ein gong at eg også måtte lage butikkblogg. Eg har blogga tidlegare også, i om lag tre år. Først om hagen, så om handarbeid. Hagebloggen er ganske stille for tida, men eg har eit håp om at det skal bli meir liv der snart. Men etter at eg oppretta Lin & Papirbloggen har eg ikkje heilt visst kva eg skulle gjøre med handarbeidsbloggen. Eg har brukt ein del tid på å gruble over korleis eg skulle gripe det fatt. Kvar går grensene mellom det som høyrer til i ein privat blogg og ein butikkblogg? Korleis fordele det eg lagar mellom dei to? Og kvar kjem ulldyra inn i bildet?

Løysinga gav seg egentlig sjølv når eg innsåg at eg slett ikkje ville skrive ein butikkblogg der det berre er innlegg av typen ’No er det salg!’ og ’Nye varer i butikken’. Det er ikkje noko givande i det, verken for den som skriv eller den som les. Derfor, kjære venner, blir det no slik at alt kjem til å havne i denne bloggen. Både det som har med butikken å gjøre men også meir personlege fortellingar om kva eg gjør, lagar og tenker. Eg håpar ingen tar seg nær av det. 

Og då startar eg med å vise fram kostymet eg laga til karnevalet i barnehagen forrige fredag. Skjønt kostyme er vel å ta litt hardt i, det er strengt tatt berre ein forklekjole. Men her i huset meiner me at det er tilbehøret som gjør eit antrekk, og det er heilt klart tilbehøret som spelte hovudrolla denne gongen også! 

I fjor sydde eig ein kjempefin rødhettekappe til dottera i huset (kvelden før, sjølvsagt) men ho nekta fullstendig å ta den på seg. Det var ikkje snakk om å kle seg ut til noko karneval, aldeles uaktuelt. Det skal nevnast at jenta var midt i verste trassalderen og aldri ville ha på seg noko nytt før det hadde gått minst ei veke. 

No er ho snart fire og heldigvis litt meir fornuftig, men likevel vart eg overraska då ho begynte å snakke om karneval lenge før jul. Ho ville vere Pippi, sa ho. Flotte greier, sa eg og tilbydde meg å sy forklekjole med lomme på magen, akkurat som i Pippiboka. Ja, men ho trengte apekatt også, fekk eg til svar. Herr Nilsson måtte jo sjølvsagt vere med! Det har sine ulemper å drive kosedyrproduksjon i kjellaren, på heimefronten blir det nemlig forventa at ein kan trylle fram kva det skal vere på null komma niks. Men eg tenkte at apekatt skulle vel gå an, og resultatet låg under juletreet på julaftan. Herr Nilsson var ein sikker hit, han har blitt dulla med og lekt med kontinuerlig sidan jul. Det varmar eit morshjerte når ein ser at den mest populære julegåva var den som var heimelaga! 

Men etter ei stund begynte det å bli snakk om hest også. Kostymet ville ikkje vere komplett utan Lille Gubben. Hjelpes, tenkte eg, får eg dette til? Men då det slo meg at det kunne vere kjepphest, løsna det. Og kjepphest blei det. Dette er ein prototyp med heilt klart forbetringpotensiale, men han gjorde jobben.  Egentlig skulle han hatt både nasebor og grime også, men det får eg ha til gode. No er eg er hekta og har lyst til å lage ein heil serie kjepphestar! Hvis eg berre hadde hatt tid...

Det spøkte for heile karnevalet då me fekk omgangssjuka i hus og hovudpersonen begynte å kaste opp på mandagen før. Ho hangla seg gjennom veka men var heldigvis frisk til fredagen og deltok i karnevalsfest med liv og lyst. Og med dei finaste accessories i heile barnehagen, om eg skal seie det sjølv!

Nominering på Håndlaga 2011

De har vel fått med dykk at nomineringa til Håndlaga 2011 opna i går? Og allereie har det kome masse bra linkar! De kan nominere handlaga favorittgjenstandar i åtte ulike kategoriar, les meir på handlaga.no!

Velour, frotté og jersey i butikken!

Jepp, då er det endelig på plass. Dessverre kom det ikkje brun velour som eg bestilte, men blålilla, gråmelert og turkis kom vel fram.

Og eg er heilt forelska i bomullsfrottéen, lett og smidig er den, og kjempefine fargar. Når eg berre klarar å bestemme meg for kva som er favoritten trur eg jammen det blir tunika til mor.
 

Eg har også tatt inn nokre stripete jersey/interlockar, frøkna i huset har lagt sin elsk på den rosa/brune (men det var vel ingen bombe, det er rosa som gjeld der i gården!)
 

Som vanleg er alt 100% økologisk bomull. Det vil seie at bomullen er dyrka utan bruk av sprøytemidlar, og at produksjonen er gjort på miljøvennleg vis. Bra for oss og bra for dei som arbeider med å dyrke/produsere! 

Håndlaga 2011 søker sponsorer!

Eg og min eminente samarbeidspartner Unni Strand har stukke hovuda saman og kome opp med noko me trur blir kjempegøy; et norgesmesterskap i handlaga!

Det blir ein konkurranse med åtte kategoriar; Redesign, barn, klær, smykker, tilbehør, til hjemmet, bilde og beste handarbeidsblogg. Alle kan fritt nominere til konkurransen, og et dommarpanel vil velge ut ti finalistar i kvar kategori. Så blir det åpen avstemning!

Vi ønsker å rette søkelyset mot den store bredda av håndlaga ting i landet, vise fram handarbeid av høy kvalitet og feire fellesskapet som får fram slike gjenstander. No søker vi etter sponsorar til dette arrangementet, og ønsker bidrag i alle slags ulike sjangere. Har du ein liten eller stor butikk av eit eller anna slag du vil profilere litt? Er du interessert? Les meir her! 

Helgetilbud på nye stoff!

Då er dei fire eg viste i innlegget under på plass i butikken! Det er alltid spennande når nye ting kjem inn, er dei like fine i verkelegheita? Og det er desse virkelig. Veldig gode å kjenne på, mjuke og glatte, og eg syns fargane er heilt herlige. Surfing, lp-plater, sol og sommar med skikkelig 60-talsfeeling!

 Eg feirar med eit lite helgetilbud på dei, 15% rabatt om du brukar rabattkoden beachmod ved utsjekking. Tilbudet gjeld berre i dag og i morgon!

Og fleire stoffer dukkar opp snart, tenk små sirkuselefantar, fuglar og polkadots. Kanskje i løpet av neste veke?

Restekorg, og nye stoffer på veg!

Då har eg flytta restane etter januarsalget over i ei restekasse i butikken, der kan du gjøre eit kupp med 40 eller 50% rabatt! Nokre av desse er det veldig lite igjen av, håpar dei går ut snart for no treng eg plass til nye økologiske bomullsstoffer som er på veg. Eg gler meg kjempemasse, her er eit par smakebitar på ting som kjem:

Har du høyrt om Pinterest?

Det store internettet er ei av mine viktigaste kjelder til inspirasjon, enten det er tilfeldig surfing eller målretta leiting. Stadig kjem eg over ein ny bloggar som lagar kjempefine ting, eit bilde av eit dyr eg har lyst til å lage til eplabutikken min, eller eg leitar etter leverandørar til Lin & Papirbutikken. så er det det med å halde styr på alle desse nettstadene på best mulig vis. Kor lenge har eg ikkje slitt med lange bokmerkelister med ymse undermapper som etterkvart er heilt umulig å finne fram i? Hukommelsen min er ganske visuell, og namnet på ein link seier meg ikkje alltid like mykje om kvifor eg har bokmerka den. 

Men så ein dag kom eg over det mest geniale eg har sett på lenge; Pinterest! Strukturelt sett er det ein nettstad der du lagar "oppslagstavler", og til desse tavlene kan du enkelt "pinne" bilder du kjem over på nett. Bilda blir sittande på tavla med link tilbake og det heile. Du kan lage så mange tavler du vil, kalle dei det du vil og sortere dei slik du vil. Og på toppen av alt har du heile sosiale medier-greia her også, det vil seie at du kan følge andre, like og kommentere bilda eller tavlene deira og "repinne" ting som andre har på sine tavler. Merk at alle bilder og alle tavler du legger til blir liggande åpent slik at alle kan sjå dei, dette er ikkje staden å bruke til ting ein ikkje vil dele med gud og kvarmann.

Eg har feks ei tavle med bilder av kattar som strekker seg, fordi eg har planar om å lage ein kattefigur i ull ein dag med denne fasongen. Og då er det viktig å gjøre grundig research for å få riktig form. Eg har også ei tavle med bilder av fjør i ulike variantar, berre fordi eg syns dei er så fine. Og ei med diverse julepynt av papir, no kan eg enkelt gå tilbake og finne linkane med framgangsmåtene før neste jul!

No har eg testa dette ut ein stund, og eg kan berre anbefale det på det sterkaste. Det er eit veldig effektivt verktøy for oss som brukar nettet til alt mulig rart. Sånn ser mine tavler ut, ta ein kikk innom!